موقع صن سيت
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

موقع صن سيتدخول

descriptionحملة لمنع عرض فيلم اميرة والسبب موجع للغاية Emptyحملة لمنع عرض فيلم اميرة والسبب موجع للغاية

more_horiz
تخيل تيجي تعمل فيلم عربي بتطرح فيه قضية الأسرى الفلسطينيين في سجون الاحتلال فبدل ما الفيلم يناقش قضيتهم ويعرض مأسيهم ويوصل صوتهم للعالم كله لا ده يقرر بكل وقاحة أنه يشوه صورتهم ويطعن في نسب أبنائهم وشرف زوجاتهم ويستخدمه عدوك كحجة ويروجلك فيلمك ده لأنه حرفياً عمل اللي فشل فيه هو !

ده بالظبط اللي عمله الفيلم اللي في الصورة اللي اسمه " أميرة " واللي بيناقش قضية مشهورة جدا من بعد 2012 في فلسطين وهي تهريب النطف من داخل سجون الأسرى الفلسطينيين لزوجاتهم خارج السجون لعمل عمليات حقن مجهري من أجل الحصول على أبناء لأن الاحتلال مانع زيارات زوجية شرعية للأسرى.

القضية الأصلية عاملة حالة جنون للاحتلال هناك بسبب نجاحها وخداعهم فييجي الفيلم يناقش القضية دي بالذات دونا عن غيرها من القضايا وبدل ما يشيد بالأمر ويبروزه كإنجاز يحسب لناس مأسورة وزوجات مضحية مخلصة لا ده يشوهه أسوأ تشويه لما يعرض ضمن قصة الفيلم ان بطلة الفيلم "صبا مبارك" اللي قايمة بدور زوجة أسير فلسطيني وبعد تحصلها على نطفة مهربة من زوجها وحملها وولادتها لطفل منه تكتشف بعدين ان النطفة اللي تحصلت عليها في الأساس مش نطفة زوجها لا دي نطفة جندي إسrائيلي!

متخيل الوقاحة والقذارة وقلة الأدب والطعن في أنساب عشرات الأطفال وتشويه صورة القضية بالكامل بفيلم من إنتاج مصري عربية وتأليف مصري وممثلين عرب!

الفيلم من كتابة مصرية ل آل دياب ( محمد المخرج و شقيقيه خالد و شيرين ) وحقيقي محدش يعرف استندوا على إيه لما بدأوا كتابة السيناريو (المشبوه المشوه ده ) فلا هما التقوا بزوجات الأسرى أو مختصين في موضوع الأسرى واعتمدوا على خيالهم المريض لزرع افكارهم المسمومة دي في صلب قضية نبيلة زي دي.

المفروض والطبيعي أنه (كتاب الفيلم ) لو مهتمين ومنحازين لجانب الأسرى زي ما بيقولوا كانوا قاموا بالبحث و التعمق أكثر في القضية دي التي تعتبر مفصلية و أساسية لكل أسير موجود ورا قضبان الظلم والعدوان واخد حكم بالسجن المؤبد و مع ذلك بيناضل من أجل الحياة لما بيقرر يهرب نطفته عشان يخلف طفل أو طفلة!

وعشان نوضح الصورة الحقيقية للقضية ونعرف ليه صناع الفيلم ظالمين متجنيين وجهلة عن عمد وإن دفاعنا عن الأمر مش مبني على تعاطف فطري مع المظلوم والمستضعفين فقط لا ده مبني على وقائع وأدلة تعمد تجاهلها الفيلم.

هنسرد مع بعض اهم النقاط اللي سردتها الباحثة الفلسطينية الأستاذة "عبير الخطيب" اللي اعدت دراسة علمية حول موضوع تهريب النطف سمتها " ثورة تهريب النطف من المعتقلات الاسرائيلية "

بحث علمي خد من وقتها وجهدها سنة ونص كاملين.

دراسة شاملة شملت غزة، القدس، الضفة الغربية، الداخل المحتل.

دراسة حازت على أفضل بحث علمي على مستوى الوطن العربي سنة ٢٠١٩.

البحث اتناول كافة الجوانب لعملية تهريب النطف، الأسباب اللي دفعت الأسرى، التخوفات، الأسس الدينية والمجتمعية
الواقع اللا قانوني اللي ييفرضه الاحتلال على الأسرى وعلى أطفال النطف المهربة!

وهنسرد شوية وقائع موثقة من البحث ده لتفاصيل عملية التهريب والانجاب بالطريقة دي تغافل عنها صناع الفيلم المشبوه عن عمد.

- الأسير لما بيقرر يهرب نطفة وفق الشرع لازم يكون بموافقة زوجته وأهلها واهله.

- النطفة بتطلع من ظلمات السجن للنور بواسطة الوسيط وتستقبل بواسطة شاهدين بالغين عاقلين من اهل الاسير واهل زوجته .!

- العملية بيتم الاتفاق عليها قبل موعد اخراج النطفة بشهور وتخضع زوجة الاسير لتحضيرات علاجية مسبقة ..!

- الاسعاف بتكون مجهزة وبتستنى النطفة في أقرب مكان وفيها أهل الاسير وأهل زوجته كشهود اضافيين بعد شهود المعتقل اللي على الاسير ابلاغ اثنين منهم قبل العملية واثنين تانيين بعدها عشان يبقوا اربعة وعلى الشهود انتظاره قدام باب الحمام وعلى الأسير اخراج نطفته بالحامل للنطفة ويوصفه ليهم ،يعني (الاسير يوضحلهم النطفة أهي خبيتها في كيس شيبسي او او او )

أيوة اسرانا البواسل طلعوا النطفة (في ولاعة ،وكيس شيبسي ،وحبة تمر ..!)

- زوجات الأسرى هما اللي بيطلبوا النطفة لانه في فلسطين عادي تلاقي زوجات عاشوا شهرين وثلاثة مع أزواجهم الاسرى وبعدها اعتقل زوجها وتم الحكم عليه بالمؤبد.

- أحد الأسرى قرر يسرح زوجته بالأحسان بعد الحكم عليه ١٩ سنة وكان متزوجها ستة أشهر بس وهي اللي طالبته وأقنعته بتهريب النطفة عشان تكون زوجة محبة وأم لابنه.

- في غزة بعد تهريب النطفة بيجتمع والد الأسير ووالد زوجة الأسير في صلاة العشاء وبعد الصلاة بينادي والد الاسير بالناس بمنتصف الجامع يا عالم ابني هرب نطفة وزوجته موافقة وةأبوها يباركلنا ..والد زوجة الاسير بيبارك والناس بتبارك وبيجتمعوا الجبران والأهل في بيت والد الاسير مع أهل زوجته بيحتفلوا!

- في الضفة في الخليل بالتحديد زوجة أحد الأسرى المحكوم عليه ب٢٢ سنة حطت شرط أنه سماعة الجامع تعلن بمكبرات الصوت أنه زوجها هرب نطفة وأنها موافقة تزرعها وينادوا بمكبرات الصوت باسم زوجها واسمها لمدة 3 أيام وكل الخليل تيجي تبارك لها قبل الزراعة وبعد الانجاب.

- الأسرى داخل السجون لما بيعرفوا أنه زوجة أحد الأسرى أنجبت ابن نطف مهربة بيحتفلوا، بيكبروا داخل الأقسام ، وبيهللوا، وبيغنوا، وبيباركوا وبيدقوا على الشبابيك والأبواب احتفالاً بالنصر، وبالليل بيعملوا الحلويات وبيوزعوها مباركة للأسير.

- أطفال القدس أبناء النطف المهربة الاحتلال بيرفض يمنحهم أي ورقة ثبوتية إنهم موجودين على قيد الحياة ، وبيحرموهم من التأمين ولا يتم احصائهم ( وكان باب أولى لصناع الفيلم مناقشة القضية دي بدل الطعن بنسبهم وشرف أمهاتهم)

- مش كدة وبس ده أي أسير فلسطيني مقدسي بيتم الحكم عليه وزوجته بتكون حامل قبل أسره وتوضع جنينها بعد الحكم على زوحها بتتم معاملة طفلها على أنه دون أب وبالتالي حرمانه من أوراق الثبوتية!

- احدى العقوبات اللي وقعت على أحد الأسرى وصلت لاضافة عامين على حكمه بعد علم ادارة السجون بنجاحه بتهريب نطفة ..!

- بعض عائلات من غزة وقع عليها عقوبة منع الزيارة بعد نجاح العملية وصلت للحرمان من الزيارة مدى الحياة ..!

اخيراً هل يعلم المخرج والممثلين والمنتجين
انه تم فحص DNa لاثبات نسب كل الأطفال دي ونسبة الخطأ سجلت صفر يا مدلسين.

عشان كدة متستغربش لما تلاقي كل المهرجانات الدولية والعربية والمحلية فاتحة دراعها للفيلم المشبوه ده ومتستغربش كمان لما تلاقي الاحتلال نفسه بيروجله وبيعمله دعاية وبيشكر فيه وأنه فيلم بمصداقية زيادة لأنه من تأليف وإخراج مصري وتمثيل عربي فلسطيني للأسف.

عشان كدة تصدت للفيلم لجنة شؤون الأسرى الفلسطينيين وطالبت بوقف عرضه فورا وده اللي حصل فعلاً بعد تضامن كل الأحرار والنشطاء الفلسطينيين والعرب ضد العبط المتعمد ده.

عشان يخرج محمد دياب مؤلف الفيلم يقول إنه مستغرب من الهجوم على الفيلم وأنه عارف ان اللي كتبه خيالي وأنه من وجهة نظره خياله ده بيخدم القضية الفلسطينية اللي هو كلام يخليك ترد ردود بذيئة تلقائي.

في النهاية نستغل الصحة دي عشان نؤكد ونوثق للعالم كله إن الأسرى الفلسطينين هزموا سجانهم وقهروه وحطموا الجدران والبوابات والقيود وهربوا نطفهم من قبور الظلام وانجبوا سفراء للحرية أبناء جدد لشعب جبار بيعشق الحياة شعب لا يعرف طعم اليأس ولا بيلين قدام أعتى كيان احتلالي إrهابي مخابراتي.

آخر ملاحظة وقد تكون مهمة للبعض ان من الأسماء المشاركة في إنتاج الفيلم هو المنتج المصري محمد حفظي والراجل ده من زمان وعليه علامات استفهام كبيرة في نوعية الأفلام اللي بينتجها وأنها دايما بتكون موجهة لخدمة أغراض خبيثة يكفي أنه أقولك انه منتج فيلم ريش اللي عمل ضجة من شهر وشوية وتم اتهامه بتشويه سمعة مصر واللي يراجع الأفلام اللي بينتجها الراجل ده وشركة إنتاجه هيلاقي كل فيلم انتجوه عليه نفس علامات الاستفهام والجدل ده!

الاحتلال فشل فشل ذريع في إيقاف عملية تهريب النطفات فلقى ضالته في الفيلم ده اللي بينسف القضية كلها من جدورها وبيروجله على أنه فيلم إنساني واقعي مصداقيته كبيرة بسبب صناعه العرب 🙂

#النطف_المهربة
#سفراء_الحرية
#امنعوا_عرض_فيلم_أميرة
#يحيى_الجبالي

descriptionحملة لمنع عرض فيلم اميرة والسبب موجع للغاية Emptyرد: حملة لمنع عرض فيلم اميرة والسبب موجع للغاية

more_horiz
مشكووووورة اختي

rate_review إقرأ أيضاً في عالم موقع صن سيت

assistant يجب عليك إنشاء حساب جديد أو تسجيل الدخول لإستخدام الرد السريع و كافة مميزات صن سيت

assignment إنشاء حساب جديد

chevron_left يمكنك إنشاء حساب مجانى جديد لإستخدام كافة مميزات صن سيت person_add إنشاء حساب جديد

assignment_ind تسجيل الدخول

chevron_left يمكنك تسجيل الدخول إذا كان لديك حساب بالفعل person تسجيل الدخول

آخر مواضيع صن سيت

اخترنا لكم

Top