وأنذرهم يوم الحسرة

السلام عليكم ورحمة الله وبركاته
راكب عادي في العربية وبيطلع فلوس بيعدها .. ورقة طارت ..
صاحبه قاله الحق ..
قاله ما تاخدش ف بالك دي خمسة جنيه واحنا مستعجلين
روّح البيت .. طلع فلوسه بيعدها لقاها ناقصة ٢٠٠ج .. هوووب اكتشف ان الورقة اللي طارت كانت ٢٠٠ج .. فبدأ يقول يا ريتني كنت وقفت وجبتها .
ودخلت قلبه .. ((( الحـســرة )))
زي واحد سمع الاذان فصاحبه قاله يلا بينا نلحق الجماعة ..

قاله مكسّل او اتحجج بأي حجة وصلى في البيت او ما صلاش اصلاً
لما جه يوم القيامة ووقف على اول الصراط عاوز يعدي يروح الجنة .. يحط رجله ويشيلها تاني .. يحطها ويشيلها خااااايف يقع في النار ...
هوووب يلاقي واحد عدّى من جنبه فُريره ووصل الجنة .. مين ده؟؟؟ .. ده صاحبه .. فبدأ يقول يا ريتني كنت سمعت كلامه وصليت ..ودخلت قلبه .. ((( الحـســرة ))) .. بدأ ياخد الخطوة ويمشي على الصراط لكنه وقع في النار
زي كتير مش راضي يسيب السيجارة ومش راضية تسيب الميكب والعطر واللبس اياه
زي كتير لسه بيكسل يصلي او بيأخر صلاته وبيكسل يعمل حاجة كويسة في حياته
زي كتير لسه مش عاوز يبطل يكذب او يتكبر او يصاحب بنات
زي كتير مش بياخد الخطوة انه يبطل يبص على البنات والمواقع اياها والعادة السرية
زي كتير في الدنيا بيعمل الذنب ويقول ده ذنب صغير .. وييجي يوم القيامة يلاقي نفسه بيدخل النار ٧٠ سنة مثلاً علشان كذب على صاحبه او عينه زاغت على بنت او او ...
"وتحسبونه هيّناً وهو عند اللهِ عظيم"
الحسرة .. من اعظم العذابات يوم القيامة .. ومن كتر الحسرات اللي هتقابل الناس في اليوم ده ربنا سمى اليوم ده بيوم الحسرة
"وأنذرهم يوم الحسرة إذ قُضي الأمر وهم في غفلة"
وانت بتتحسر ع الماتش اللي معرفتش تسمعه او ع البنت اللي ماعرفتش تعلقها او ع الهدوم اللي مالحقتيش تشتريها او ع النت اللي علق وانت فاتح حاجات حرام..
افتكروا الحسرة الأكبر .. حسرتك وانت مفيش قدامك ولا فرصة انك ترجع تصلح .، مفيش فرصة انك تتوب وتستغفر .. اقرأ
"ويوم يعضّ الظالم على يديه يقول يا ليتني اتخذت مع الرسول سبيلا .. يا ويلتىٰ ليتني لم أتخذ فلاناً خليلا"
"حتى إذا جاء أحدهم الموت قال ربّ ارجعوون
قال رب ارجعونِ لعلّي أعملُ صالحاً فيما تركت .. كلا إنها كلمة هو قائلها"
"أن تقول نفسٌ يا حسرتى على ما فرطتُ في جنب الله"
"حتى إذا جاءتهم الساعة بغتة .. قالوا يا حسرتنا على ما فرطنا فيها"
"يومئذ يتذكر الانسان وأنىٰ له الذكرى .. يقول يا ليتني قدمت لحياتي"
أن تدخل الحسرة قلبك في الدنيا خير من الاخرة
اتحسّر على كل صلاة فجر كان المنادي ينادي حي على الفلاح وانت نايم
اتحسّر على ليلة عدت من غير ما تصلّي قيام
اتحسّر على كل معصية عملتها
انا مش بسوّدها في وشك .. بس لازم اكون صريح معاك وانبّهك
وانت لسه في فرصة إنك تصلح في الدنيا وتبطل الحاجات الحرام وتقرب من ربنا أكتر
قبل ما تدووووق مرارة الحسرة في الاخرة
#وأنذرهم_يوم_الحسرة
#الحسرة

يارب نسألك الثبات

استغفر الله العظيم ونتوب اليه

بارك الله فيكي

برافو عليكي

احسنتِ

احسن الله إليك اخ @حسام