قصه استقامتى..يمكن تفيدك

ف فترة من حياتى كنت سئ جداً .. كل حياتى كانت غلط ف غلط .. و ف يوم كده اتخنقت من ال كنت فيه و كنت حاسس بضيق كبير كأن قلبى كان بيغرق ف بحر من السواد و عايز يطّلع علي الوش ياخد أى نفس .. و ف اللحظة دى أذن مؤذن صوته جميل لأذان العشاء .. انا فاكر اللحظة دى كويس كنت قاعد مع صحابي بنهزر روحت باصصلهم و قولتلهم " ماتيجو نصلى " .. انا مش عارف ازاي قلت كده و هم كمان استغربوا من الجملة كأنى ضربتهم ب فحل بصل ف وشهم و لقيتهم باصينلى باستغراب ..
المهم انا ولا كأنى واخد بالي نزلت من السكن و رجلى سحبتنى للمسجد .. دخلت إتوضيت و صليت مع الجماعة .. و حسّيت إنى اخدت نفس بعد خنقة كبيرة .. رجعت السكن حسّيت اني لِسَّه محتاج تانى .. رحت واخد دش وماسك المصحف ده فى ظل استعجاب من صحابي "دخلت أوضتى قفلت عليا و قلت أصلى من المصحف لأنى كنت ساعتها مش حافظ قرآن كتير ..
المهم قلت عايز سورة كبيرة بس ماتكونش البقرة عشان باسمعها كتير .. عايز حاجة اكون مسمعتهاش خالص .. فتحت سورة آلِ عمران و صليت .. و بعد اول ركعة و انا ف السجود لقيتنى بادعى لربنا و باقول انا آسف يا رب سامحنى .. أنا بأعمل حاجات كتير غلط و ماشوفتش منك غير كل ستر و رحمة و رزق و كرم .. و قلت " أنا بحبك أوى يا رب " استغربت الجملة بعد ما قلتها و قلت ايه ده ؟ هو انا ينفع أقول لربنا انا بحبك اوي يا رب .. و حسّيت اني قلت حاجة غلط ف قلت أنا آسف يا رب و رحت قايم بسرعة من السجود و دخلت ف الركعة التانية و مسكت المصحف و أول آيه قريتها بعد الدعاء ده كانت
قُلْ إِنْ كُنْتُمْ تُحِبُّونَ اللَّهَ فَاتَّبِعُونِي يُحْبِبْكُمُ اللَّهُ وَيَغْفِرْ لَكُمْ ذُنُوبَكُمْ ۗ وَاللَّهُ غَفُورٌ رَحِيم
مش هاقولكم على احساسى ف اللحظة دى و رعشة ايدى و دموعى اللي غرقت المصحف و انا حاسس ان ربنا بيكلمنى .. انا عايز أقول حاجة تانية خالص .. الحمد لله إنى سمعت الاذان وهز كياني .. و الحمد لله ان لما رجلى ساقتنى للمسجد .. سبتها ..
هتجيلك فرصة للحظة تحسسك إنك عايز تبعد عن الغلط .. إوعى تضيعها ..
احبكم في الله ^^

1	#صن_سيت
2	#محبوب_الجماهير
3	#ايام_رمضان
4	#اخبار
5	#مصر
6	#داعش
7	#عاصفة_الحزم
8	#تفسير_الاحلام
9	#الحوثيين

الانتقال الى القسم بشكل سريع

هل ذكرت ربك اليوم ؟ close

قصه استقامتى..يمكن تفيدك

قصه استقامتى..يمكن تفيدك