قرار قتل رسول الله
صلى الله عليه وسلم
وحصار قريش لبنى هاشم "قبيله رسول الله

دلوقتى الصحابة قاعدين فى الحبشة فى أمان مع النجاشى بعد ما فشلت خطه قريش لما بعتت عمرو بن العاص(قبل إسلامه) عشان يأثر على النجاشى لكن الحمدلله رفض النجاشى يسلم الصحابه له..طيب إيه الوضع دلوقتى فى مكة ؟

الوضع سيئ جدا لان قريش يأست، الإيذاء و تعذيب الصحابة فشل..كل المحاولات فشلت و الصحابة هاجروا..طب قريش هتعمل إيه ؟
هتاخد قرار واحد "نقتل محمد"، و خلاص ابو طالب عم النبى مبقاش له كلمة وسطهم ولا يقدر يمنع قريش زى زمان فأبو طالب إضايق جدا جدا لما عرف بموضوع قتل النبى،طب ابو طالب عرف منين ؟

أصل بدات قريش تعمل اجتماعات فى الحرم و متستدعيش ابو طالب رغم أنه من سادة قريش و كان متعود يحضر دايما
فبدأ أبو طالب يشك انهم بيخططوا لشئ يخص النبى..فراح ابو طالب باعت ولد يتجسس عليهم
و قاله : تروح هناك و أعرف لى همه بيخططوا لأيه، وفعلا راح الولد وجه و قال:يا ابا طالب يريدون قتل ابن اخيك..

فأبو طالب أتجنن و مبقاش عارف يعمل ايه فخد النبى عليه الصلاه و السلام و دخل الحرم و مسك إيد النبى عليه الصلاة و السلام

و قال:يا معشر قريش والله لو قُتِلَ محمد لنقاتلنكم أنتم و نحن بنى هاشم حتى نتفان(يعنى حنحاربكم و تحربونا لحد ما نخلص على بعض) و راح قايل: تعالى معى يا بن اخى و خد النبى عليه الصلاه و السلام و مشى..

حيتعرض النبى ﷺ لمحاولات قتل حتستمر لمده 3سنين.. انتو متخيلين !! إيه إحساسك لما تبقى حامل هم انك ممكن تتقل فى أى لحظه؟! وابو طالب حيتجنن، لازم يحمى الرسول ﷺ بأى طريقه (رغم أن أبو طالب كافر) ..

طيب هتعمل ايه يا ابو طالب ؟ عشان نفهم الخطة العبقرية بتاعته لازم نعرف سوا شكل مكة عامل ازاى..مكة دايرة كبيرة و فى نصها الحرم (ده زمان مش دلوقتى) و حوالين الحرم بيوت فى شكل دائرى و مكة مليانة جبال و منحنيات حوالين الحرم و ما بين كل جبل و جبل ارض ضيقة جدا اسمها " شِعب" زى الحاره كده ، اهل مكة متقسمين اغنياء و فقراء ...الاغنياء ساكنين على الجبل و شايفين منظر الكعبة الجميل، و كل ما يكون البيت أغنى كل ما يكون اقرب للكعبة..أما الفقراء ساكنين فى الشِعاب اللى بين الجبال..

و بنى هاشم قبيلة النبى محمد عليه الصلاه و السلام فيها الاغنياء منهم ساكنين على الجبال و الفقراء فى الشِعاب..طيب ابو طالب هيعمل ايه؟
أبو طالب بما انه سيد بنى هاشم حيصدر قرار ان كل بنى هاشم سواء الأغنياء و الفقراء حينزلوا و يتكدسوا و يعيشوا فى الشِعاب و نحط الرسول فى النصف و نعيش كلنا مع بعض و حواليه..
( أصل ابو طالب عايز يخلى النبى عايش فى مكان متكدس و زحمه.. ويبقى كل الناس عارفه بعضها فيه عشان لو دخل حد غريب وسطهم، يتمسك على طول)

فكل بنى هاشم هتتكدس فى "شعب " واحد..بس كدة عندنا مشكلتين:
1- ان بنى هاشم فيها فقراء و اغنياء يعنى معنى كدة الفقير معندهوش مشكلة لكن الغنى هيضطر يسيب بيته و الرفاهية و ينزل يتكدس تحت عشان يحمى الرسول ﷺ.. طيب ده لمدة اد ايه؟
( حيفضلوا فى الشِعاب 3 سنين ..بس على فكره هما ايامها كانوا فاهمين ان الموضوع هياخد شهر بالكتير )
المهم كلهم نزلوا الشِعاب وهدفهم حماية النبى ﷺ
..طيب المسلم نزل عشان يحمى عقيدته و دينه لكن انت يا كافر نزلت ليه؟

عشان "الحمية القبيلية" سبحان الله حتى لو هو مش من دينى بس ميتقتلش واحد من قبيلتى و انا على وش الدنيا..يستحيل يحصل..و نزلوا الشعاب فعلا (هنا بقى نسأل نفسنا سؤال و نفكر لو فى أيامنا دلوقت و قالولك سيب عربيتك و اللاب توب و البيت و تموت من الجوع بس كل ده عشان بس تحمى رسول الله ﷺحتوافق ولا لأ ؟ و قيس على ده.. إيه اللى ممكن تتحمله عشان بس تنشر سيرته عليه الصلاه و السلام؟ )
المهم أتكدست بنى هاشم فى الشِعاب و قريش شافت المنظر ده فأتجننت، و قالت قريش :مش انتوا اتكدستوا تحت، طيب احنا هنحاصركوا من فوق وبقى فيه حصار على شعب بنى هاشم ، حصار اجتماعى و اقتصادى و دينى و ده حصار شديد جدا.

و عملت قريش اجتماع طارق و اتفقيات تنص على أن ممنوع حد يتجوز من بنى هاشم و لا يبيع لبنى هاشم و لا يشترى منهم و غير مسموح لأى حد أنه يسمع عن الإسلام من أى حد من بنى هاشم و حنكتب الكلام ده فى وثيقة و نكتب الشرط الاخير فى الوثيقة وهو
"يا معشر قريش لا تاخذكم ببنى هاشم رأفة و لا رحمة مهما حدث"
و تتختم الورقه و تتوثق و تتعلق على الكعبة كأنها شئ مقدس و اللى يخالف الوثيقة دى حيتقتل..
طب موقف بنى هاشم و حيعيشوا ازاى وسط الحصار ده ؟!

بعد ما قررت قريش أنها تحاصر بنى هاشم سواء كفار او مسلمين و كان أصعب حاجه فى الحصار هو ان قريش شلت حركه البيع و الشراء و دا طبعا معناه ان بنى هاشم معرضه أنهم يموتوا من الجوع رغم انهم معاهم فلوس و فى منهم أغنيا لكن للاسف البيع و الشرا واقف..و الحصار عمل مشكله تانيه كمان هي ان الإسلام تجمد لمدة 3 سنوات ..الدعوه واقفه و المسلمين نفس العدد مش بيزيدوا و فوق كل ده معرضين انهم يموتوا 😢 والإسلام ينتهى..

بنى هاشم هدفها حمايه النبى.. حمايه واحد من قبيلتهم واتمسكوا بهدفهم ده و فضلوا متحاصرين و كانوا مش بيقدروا يخرجوا أبدآ من الشِعب غير وقت الحج عشان قريش خافت على منظرها قدام القبائل التانيه أنه يبان أنها حابسة بنى هاشم و منعاهم من الحج..
و كان النبى عليه الصلاه و السلام يطلع وقت الحج يدعو الى الله و الإسلام لكن محدش كان بيرضى يدخل الإسلام بسهوله..وكان يطلع عليه الصلاه والسلام يثبت الصحابه و يطمنهم، ما هو اصل الصحابة اللى مش من بنى هاشم قاعدين بعيد عن النبى عليه الصلاه و السلام و معرضين للإضطهاد والمضايقات من قريش..

و بعد وقت الحج يرجع النبى و المسلمين اللى من بنى هاشم للشِعب و حصاره تانى..والحصار أشتد و بنى هاشم تعبت و الجو برد جدا، الصحابة بيقولوا : والله كنا نأكل ورق الشجر من الجوع حتى تقرحت افواهنا و والله كان صوت بكاء الصبى من شده الجوع يصل الى الحرم..
كانت الام فى الحصار تجيب حصى و تحطه على النار و تعد تقلب.. و توهم الاطفال ان الاكل بيجهز لحد ما يناموا و زوجها كان يطلع يحاول يتكلم مع اى تاجر لعل قلبه يحن و يرضى انه يبيعله أكل.. كان يجرى الصحابى على التاجر
و يقوله : اقسمت عليك ان تبيع لى الطعام بأى ثمن..و يرفض التاجر..فيقول له :اقسمت عليك.. أما تسمع بكاء الاولاد!! 😢

فالبائع يتحرك قلبه ولسه حيدى للصحابى أكل، تقوم تحصل مشكله .. إيه هي؟
قريش لها عين فى كل مكان..و فى نفس اللحظة ابو لهب يبقى موجود ويقول:يا هذا.ماذا تفعل؟..
فيقول التاجر:لاشئ..
فيقول أبو لهب: أتبيع له؟!!...
فيقول التاجر :لا..لا..
فيقول ابو لهب:اياك اياك ،أنسيت الصحيفه ؟(يقصد الورقه المختومه اللى متعلقه على الكعبه)..
فيقول التاجر : لا انساها ويوصيه أبو لهب أنه ميبعش أبدآ لبنى هاشم و يوعده بإنه حيديله اضعاف اضعاف المال اللى كان حياخده لو باع..
فيقول البائع للصحابى: أعزرنى انا اسف مش حقدر أبيعلك..

فيمشى الصحابى و يرجع أيده فاضيه و يدخل و هو بيبكى،فتقول الزوجة القوية : لا عليك,لا عليك..و تهدى الاطفال لحد ما يناموا ..و يستحمل الصحابه و رغم العذاب ده،مفيش حد مسلم او كافر من بنى هاشم أتخلى عن النبى عليه الصلاه و السلام..الصحابى متمسك بالدين و الكافر متمسك بالحميه القبيليه ..طيب فين خديجة بنت خويلد دلوقتى (زوجه النبى)؟ خديجه معاهم فى الحصار..و عمرها 63 سنة..فرجال قريش يبعتوا حد يقولها :يا خديجة انت من شرفاء مكة لا تقعدى فى الشِعب خليكى على دينك الإسلام بس عيب تقعدى تحت معاهم ..فتقول :لا و الله انا مع المسلمين وتفضل مستحمله العذاب.

ومره تانيه بعتولها صينيه أكل و يقولوا لها :يا خديجة طب خليكى تحت بس حنبعتلك صنية اكل كل يوم بالليل فتقول خديجه رضى الله عنها : لا و الله لا نريد منكم شئ.. وطبعا هي بتتصرف كده عشان قريش متحسش أنهم كسروا النبى عليه الصلاه و السلام و المسلمين..ويخرج الهاشمى الكافر يحاول يجيب اكل وميقدرش..و الصبيان يقولوا :يا ابى يا ابى هل من طعام ؟ هل من طعام؟
وواحد من الصحابه بيقول خرجت فى يوم أتبول..فسمعت طأطأه لبولى على شئ فى الأرض ففرحت و قلت انها تؤكل (افتكرها حاجة تتاكل و واقعه على الأرض )

فيقول : فتيممتها فإذا هى شحم بعير (عشان الدنيا ضلمه فمد ايده وحاول يدور عليها ع الأرض فلاقاها حتة دهنة أتبقت من أكله جمل) فبيقول : فمسكتها و غسلتها ووضعتها فى النار لأطهرها حتى اصبحت رماد ,فجعلت أسفها(بيحاول ياكلها مكنتش بتتبلع)..و بيقول : فشربت عليها الماء و بقيت عليها 3 ايام.. يدوب قادر يتحرك 😢

نكمل فى الحلقه القادمه فى التعليقات إن شاء الله ❤